Ginmultahan ang isa ka Ialaki sa Italy sa alegasyon nga gintudlo-an sini ang iya ido nga magbitbit sang basura sa baba kag ihaboy ini sa kilid sang dalan agud nga indi na ini magbayad para sa koleksyon sang basura.
Ginpagwa sang mga otoridad sa Catania, Italy ang CCTV footage kun sa diin makit-an ang isa ka ido nga gamit ang iya baba nagabitbit ini sang plastic nga naga-unod sang basura kag ibilin sa kilid sang dalan antes magbalik pauli.
Ginmonitor sang kapulisan ang ido tubtob nga nakilal-an ang iya ugalon.
Matapos ang pagtoon sa CCTV footage, nakumbinse ang mga otoridad nga gintudlo-an ang ido nga maghaboy sang basura para indi sila makita sa camera nga sila ang nagahimo kag ang ido lamang ang madakpan.
Ginmultahan ang nagapanag-iya sang ido apang indi klaro kun paano nila napamatud-an nga gintrain ang ido para sa illegal waste dumping.
Sa idalom sang layi sa Italy, ang madakpan nga nagahaboy sang basura sa indi husto nga lugar mahimo multahan sang kapin P102,000 tubtob P1.2 million apang wala sang ano man nga layi nga nabutang kun ano ang mahimo nga multa para sa ido nga illegal nga nagahaboy sang basura.
