BACOLOD CITY-Padayon pa nga ginatumod ang gintunaan sang kamatayon sang lalaki nga nasapwan sa kwarto sang isa ka inn sa ciudad sang Bacolod.
Sa inisyal nga imbestigasyon sang Bacolod Police Station 4, ginkilala ang biktima kay Eddie Mar Fernandez, 30-anyos sang Villa Fatima Subdivision, Imus, Cavite kag appraiser sang Crown Property Appraisal.
Ini ang nasapwan na lamang nga wala na sang kabuhi sa sulod sang banyo sang isa ka hulot sa Tourist Inn sa corner Burgos-Aquino Road, Brgy. Villamonte pasado las-6:00 sini nga gab-i.
Suno sa hepe sang nasambit nga police station nga si Police Senior Inspector Rey Tolosa, ginpilit nga buksan ang hulot nga ginatiniran sang biktima matapos nga indi na ini makontak.
Suno kay Tolosa, nagkadto sa inn ang upod sini sa trabaho agud usisaon ang biktima bangud nga kahapon sang gab-i pa ini ulihi nga nakapakig-angot sa iya ginatrabahuan.
Sang ginbuksan ang kwarto, nakit-an ini nga wala na sang kabuhi sa sulod sang banyo.
Suno kay Tolosa, wala man sang upod nga nagcheck-in ang biktima kag sa inisyal nga pagpangusisa wala man ini sang pilas sa lawas.
Ginahulat pa sa karun ang resulta sang tul-id nga imbestigasyon agud matumod ang gintunaan sang kamatayon sini.
