Nakakita kana bala sang tawo nga ginsaniban?
Ginkakibot sang Volusia County Sheriff sa Florida, USA sang ila ginparahan ang isa ka salakyan, bangod ang angkas sini ang kaangay nga nasudlan sang malain nga espirito.
Naga li-ad kag naga-alalawas ang lawas sang lalaki sa bentana sang salakyan gani dali-dali man ini nga gin-alalayan sang mga kapulisan tubtob nga nakapungko ini sang maayo sa sulod sang salakyan.
Gintulok pa sang lalaki ang mga pulis antis ini naggwa kag nagtuyo nga magpalagyo.
Apang, ang lalaki wala makapalayo sa mga pulis kag siya ang gilayon man nga ginpahapa sa duta.
Gintsekyar sang mga otoridad ang salakyan kag natukiban ang mga spirit drugs kag iban pa nga sahi sang illegal nga droga.
Narekober sa salakyan sang lalaki ang apat ka kilo sang nagkalain-lain nga droga kaangay sang MDMA ukon ecstasy, amphetamine, ketamine, kag cannabis ukon marijuana.
Ginakabig ini nga isa sa pinakadaku ng droga nga narecover sa Volusia County.
Gin-raid man sang mga kapulisan ang balay sang suspek kun sa diin ila nakita ang dugang pa nga sahi sang mga illegal nga droga kaangay sang cocaine kag psilocybin ukon magic mushrooms.
Narekober man ang 11 ka mga armas luthang kun sa diin isa diri ang natumod nga kinawatan.
Ginkilala ang suspek nga si Carey Thomas Crownover kag siya ang nagapangatubang sang sampaw-sampaw nga kaso.
