Patay ang isa ka lalaki matapos nga gintiro sang wala makilal-an nga persona sa Sitio Cambalogbog II, Brgy. Telim, Calatrava, Negros Occidental kahapon sang aga, Marso 26, 2025.
Sa interview sang Bombo Radyo Bacolod kay Police Major Wilfredo Benoman, hepe sang Calatrava Municipal Police Station, may yara sang late reported nga shooting incident nga natabo sa nasambit nga lugar kag ang biktima ang ginkilala kay alyas Boy, 39 anyos, mangunguma kag residente sang Sitio Cambalogbog II, Brgy. Telim, Calatrava, Negros Occidental.
Suno kay Benoman, santo sa ila nga imbestigasyon alas-6:00 ang takna kahapon, Marso 26 nga ang biktima ang yara sa iya nga uma sa nasambit nga lugar sang gilayon nga may isa ka wala makilal-an nga persona ang nagpalapit diri agud nga magbakal sang tanum.
Samtang nagapalapit ang suspek gintiro sini sang makaapat ka beses kun sa diin nakaangkon sang pilas sa natuo nga dughan nga naglapos sa likod sini nga gintunaan sang gilayon kamatayon sini.
Narecover sa crime scene ang apat ka fired cartridge cases sang caliber .45 pistol.
May ara sang apat ka ginalantaw nga suspect, isa ka gunman kag tatlo nga nagserbe nga look-out nga gilayon man nga nagpalagyo sa wala mahibaluan nga direksyon matapos ang krimen.
Ang biktima ang nahibaluan man nga nagapaidalom sa drug rehabilitation.
Nagapadayon sa karun ang imbestigasyon sang Calatrava Municipal Police Station agud nga mahibaluan ang motibo kag may kahimuan sang krimen.
