Pilason ang 45 anyos nga lalaki nga ginbuno matapos nga naglikaw nga mag-upod sa abyan sa paggamit sang illegal nga druga sa Brgy Gargato, banwa sang Hinigaran, Negros Occidental, sang Martes, alas- 6:45 sang gab-i.
Ang biktima ang ginkilala nga si Renato Magquilat, tricycle drayber, samtang ang suspetsado naman amo si Ryan Garcia, 43 anyos, lunsay mga residente sang nasambit nga lugar.
Sa interview sang Bombo Radyo kay Police Lt. Voltaire Sy, Deputy Chief of Police sang Hinigaran Municipal Police Station, ginhagad ni Garcia ang abyan sini nga si Magquilat nga magsuyop sang shabu, apang nagpang-indi si Magquilat nga amo naman ang ginkaakig ni Garcia.
Ginbantayan ni Garcia si Magquilat nga maglabay kag hinali nga ginbuno sa likod kun sa diin napilasan pa gid ang siko sang biktima.
Gilayon naman nga gindala sa ospital si Magquilat nga sa karun yara na sa estable nga kondisyon.
Samtang, gilayon man nga nadakpan si Garcia kag suno kay Sy sang ini gindala sa police station, nakitaan ini sang sintomas kaangay nga nakagamit ini sang illegal nga druga.
