Bisan ano pa ka moderno ang isa ka pungsod may yara gid sang illegal settler apang sa China pinasahi ang gin-estaran sang isa ka lalaki nga wala sang kaugalingon nga puluy-an.
Nakakuha sang nagkalain-lain nga reaction online matapos nga ginpakita sang isa ka documentary sang iya kabuhi ang lalaki sa isa ka squatter sa Beijing Airport.
Si Wei Jianguo ang nagapuyo sa Beijing Airport humalin pa sang 2008.
Ang pamilya sini ang may yara sang kaugalingon nga puluy-an apang mas ginpili sini nga magpuyo sa airport.
Sang 46 anyos si Wei, ginpahalin siya sa iya trabaho kag na-depress kun sa diin ang pag-inom kag pagpanigarilyo ang nangin pala-utwasan niya agud malipatan ang mga problema.
Sang nangin alcoholic si Wei, gintinguha-an sang iya pamilya nga siya ang mapunggan.
Bangud nabatyagan ni Wei nga wala siya sang kahilwayan sa iya kaugalingon nga balay, nagpanumdom ini nga magpalagyo kag magpuyo sa Beijing Airport.
Dala ang isa ka electric cooker, isa ka habol kag pila ka mga panapton, si Wei ang nagapuyo sa airport sa sulod sang kapin sa isa ka dekada.
Suno sa iya, ang mga pasilidad sa Beijing Airport ang pinakamoderno, gani wala siya sang problema sa pagpuyo didto.
Sa sulod sang nagligad nga 14 ka tuig, ginpapauli ini sang mga pulis sang makapila ka beses kag ginbalik siya sang iya pamilya apang bangud wala sang istrikto nga pagsulundan nga nagadumili sa iya pagtinir sa airport sang tuman kalawig, si Wei ang padayon nga nagabalik.
Sa karun, wala ini sang plano nga maghalin sa Beijing Airport kag siya ang nagapuyo na didto sa sulod sang 5,198 ka adlaw.
