Nakilala na ang lalaki nga nasapwan nga wala na sang kabuhi samtang naga utaw-utaw sa baybayon nga sakop sang Barangay Taloc, Bago City, Negros Occidental sang Domingo sang aga.
Kabahin sang pahayag ni Police Lt Col. Ariel Pico, officer-in-charge sang Bago City Police Station
Sa interview sang Bombo Radyo Bacolod kay Police Lt Col. Ariel Pico, officer-in-charge sang Bago City Police Station, bangud sa pagwaragwag sa Bombo Radyo kag iban pa nga estasyon sang media napadangat ang impormasyon sa pamilya nga yara sa Barangay 39, Bacolod City.
Suno kay Pico, ginkilala sang iloy ang bangkay nga si Peter John Delos Reyes, 25 anyos kag residente sang Barangay 39.
Suno sa hepe, ginpahayag sang iya iloy wala na sini mahibaluan kun san-o sini ulihi napacheck-up ang iya anak nga ginapahayag nga may yara sang deperensya sa paminsaron.
Dugang pa sang iloy ang biktima ang masami nga nagalinakat kag nagakadto sa mga utod sini nga nagapuyo sa Canlaon City, Negros Occidental apang humalin sang Mayo 26 wala na ini nakapauli sa Barangay 39.
Ginpangita man sang pamilya ang biktima apang indi makita kag ginpakig-angutan man ang mga utod sini sa Canlaon City wala man ini didto.
Personal nga nagpadulong sa Bago City ang iloy sang biktima agud nga makumpirmar kun bata sini ang nasapwan nga nalumos sang Domingo sa baybayon sang Barangay Taloc sa nasambit nga ciudad.
Samtang, ginpahayag man ni Pico nga suno sa napamangkutan sini nga nagapangasag sa lugar kun sa diin nasapwan ang biktima masami ini didto nagapamunit kag may posibilidad nga nakalusong sa madalum nga bahin sang dagat kag nalumos.
Dugang pa sini nga nakadesisyon ang pamilya sang biktima nga sa Bago City nalang ilubong ang bangkay bangud tuman na ini kabaho na ini.
