Padayon ang pagpangita sa lalaki nga nakuhaan sang video nga nagahaboy sang basura sa sidewalk sang Barangay Villamonte, Bacolod City.
Sa video makit-an nga nagadrive sang e-bike ang lalaki nga nakatopless kag nakasab-it sang bayo sa abaga, nakashorts kag nakatsinelas.
Sa interview sang Bombo Radyo Bacolod kay Ma. Fe Tresfuentes, pinuno sang Bacolod Environment & Natural Resources Office (BENRO), ginatrace na nila ang identity kag kun diin nagapuyo ang lalaki.
Suno diri, kun may impormasyon na sila, ila ipatawag ang lalaki kag sturyahon agud mapa-intindi ang indi sini insakto nga ginhimo.
Lantawon pa man kun pasakaan sang kaso ukon dagdagan sang penaledad ang ang lalaki depende sa kabug-aton sang iya sala.
Ang lalaki ang mahimo makasohan sa paglapas sa City Ordinance 531 ukon Anti-Littering Act kag Republic Act 9003 ukon Ecological Solid Waste Management Act of 2000.
