Pilason ang isa ka 33 anyos nga lalaki matapos nga ginlabo sa likod samtang yara sa higad sang dalan sa Sitio Baclayan, Brgy. Mahalang, siyudad sang Himamaylan sang Nobyembre 6 alas-7:00 sang gab-i.
Ang biktima ang ginkilala nga si Jeoffrey Bandola, samtang ang suspetsado naman amo si Ryan Cortez kag lunsay mga residente sang nasambit nga lugar.
Suno kay P/Lt. CoL Reynante Jomocan, hepe sang Himamaylan City Police Station, nagalantaw sang videos sa cellphone si Bandola kaupod sa iya nga asawa sang sila ang ginpalapitan ni Cortez samtang hinali nalang sini nga ginlabo si Bandola.
Nag-agom sang igo sa likod nga bahin sang lawas ang biktima nga gilayon man gindala sa ospital.
Samtang arestado naman ang suspetsado kag sa karun yara na sa kustodiya sang Himamaylan City Police Station kag natalana nga pagapasakaan sang nagakaigo nga kaso.
