Nasamaran ang isa ka lalaki matapos magbato sa kapulisan nga nagresponde sa report nga may bitbit nga armas-luthang sa Purok Balinday, Barangay 2, ciudad sang Bacolod, pasado alas 10:00 ang takna kaina sang aga.
Ginkilala ang pilason kay Alyas Chong, nga may isa ka semana pa lamang nakagwa sa prisuhan matapos serbihan ang kaso nga murder.
Sa interview sang Bombo Radyo Bacolod kay Police Captain Genus David, deputy Chief of Police sang Police Station 2, nagresponde ang mga police matapos nakabaton sang report nga may bitbit nga armas-luthang si Alyas Chong.
Pag abot sa lugar, naabtan sang otoridad nga nagalakat si Chong nga may bitbit nga calibre .45 nga armas luthang kag sang makita ang patrol car, naglakat ini pasulod sa balay kag sang hana na nga magpasulod iya ginpalukpan ang kapulisan rason nga nagpalupok man ang police.
Si Alyas Chong amo man ang ginatudlo nga suspetsado sa pagpangluthang sang Hunyo 1 sa Purok Lubi, Barangay 3, ciudad sang Bacolod nga nagresulta sa pagkapilas sang duha ka persona.
