Nagpalab-ot sang bulig ang Negros Electric and Power Corporation (NEPC) sa Northern Negros Electric Cooperative Inc. (NONECO) bangod sa lapnagon nga brownout nga nakaapekto sa malapad nga konsumedor sang NONECO.
Naghatag sang dugang nga 1.5MV nga supply sang kuryente ang Negros Power sa mayorya nga populasyon sang banwa sang EB Magalona.
Sa interview sang Bombo Radyo Bacolod kay Engineer Leomel Tambanillo, Assistant Vice President for planning and busines operation sang Negros Power, sa kabug-usan 3.5MV na nga supply sang kuryente ang napadala sang NEPC sa NONECO.
Ang bulig sang Negros Power ang magapabilin tubtob nga mabalik na ang kuryente sa bilog nga franchise area sang NONECO, kun sa diin plano pa nila nga dugangan sang 1.5MV nga sarang maka-energize sang anom ka barangay.
Pasalig sang Negros Power nga ang bulig nga ila ginahatag sa NONECO ang indi maka-apekto sa demand sa load capacity sang CENECO.
