Buhi pa sang nakit-an ang isa ka lapsag nga ginlubong sa patyo sa banwa sang Pulupandan.
Sa interview sang Bombo Radyo kay Police Captain Ryan Villasario, hepe sang Pulupandan Municipal Police Station, ang nasambit nga lapsag ang bag-o gid lamang bun-ag.
Suno kay Villasario, alas 6:30 kahapon sang aga sang nagpadulong ang 22-anyos nga iloy kag live-in partner sini sa Pulupandan Public Cemetery agud ilubong ang lapsag sa pantyon sa bulig sang sipulterero.
Suno sa hepe, nagapanindugan ang pamilya nga patay na sa ila ihibalo ang bag-o bun-ag gani ila ini ginpalubong.
Alas 10:00 sang aga sang nakabati ang nasambit nga sipulterero sang hibi nagikan sa pantyon gani iya ini ginbuksan kag nakit-an nga buhi pa ang lapsag.
Suno sa hepe, wala nakahibalo ang sipulterero nga buhi pa ang lapsag sang ginpalubong ini bangud ini ang nakaputos.
Ang insidente ang ginreport sa Department of Social and Welfare and Development (DSWD) nga amu naman ang nagpadangat sang impormasyon sa mga kapulisan.
![](https://img.bomboradyo.com/bacolod/2022/06/POLICE-REPORT-1.jpg)
Gilayon nila ini nga ginpatigayunan sang imbestigasyon kag gin-istorya sa ila sang sipulterero ang natabo.
Nagapati ang kapulisan nga imposible nga indi mahibaluan sang mga ginikanan nga buhi ang lapsag kag wala man lang nila ginpacheck sa ospital antes ginpalubong.
Sa karun estable na ang kondisyon sang lapsag kag yara sa kustodiya sang DSWD.
Ang iloy, nga bag-o lamang nagbun-ag ang yara naman sa Valladolid.
Suno kay Villasario, wala sang may nakahunong sa ila estasyon apang may criminal liability ang maglive-in partner.
Sa karun nagapadayon pa ang ila imbestigasyon.