Indi lang nagakatabo sa tawo kundi mahimo man sa sapat nga makaangkon sang swerte kag makabaton man sang kaayuhan.
Kaangay na lamang sang natabo sa isa ka layaw nga ido sa Yucatan, Mexico.
Nagsulod ini sa isa ka shopping mall apang indi pagkaon ang iya gusto kundi ang isa ka plush toy sa Miniso store, gani ini ang ginkuha sang ido kag ginhampangan.
Gintinguha-an nga kuhaon sang mga empleyado nagikan sa iya ang hampanganan, apang wala gid niya ini ginbuy-an.
Madamo naman sang mga tawo sa palibot ang natandog gani nag-amot-amot sila agud baklon ang plush toy.
Matapos nag-viral sa social media, ginpangita ini sang isa ka lalaki nga si Alan Marmolejo.
Nakit-an niya ini apang wala na ang plush toy.
Nadula man ang hampanganan sa iya, naka-angkon naman sang pamilya ang ido bangud gindala ini pauli ni Marmolejo kag ginhingadlan kay Thor.
Si Thor ang nagapuyo na subong upod sa duha ka mga kuring kag nagabaton sang full veterinary care.
