Nagapasalamat ang pinuno sang Provincial Disaster Management Program Division ( PDMPD) nga nangin alerto ang mga Local Government Units (LGUs) sa pagpatigayon sang pre-emptive evacuation sang mga residente bilang pagpanghanda sa pagwaswas ni Bagyong Auring.
Sa interview sang Bombo Radyo Bacolod kay Dr. Zeaphard Gerhart Caelian, ginpahayag sini nga indi dapat magpangluya ang mga tawo nga nagpre-emptive evacuation bangud ginkapoy lang sila kag wala man nagtupa ang bagyo sa probinsya sa baylo magpasalamat bangud nakapreparar sila apisar nga wala nadayon sa pagwaswas ang bagyo.
Samtang santo sa data sang mga nagpatigayon sang pre-emptive evacuation, nakarekord ang CDRRMO sang Sagay City sa Barangay Himoga-an Baybay sang 163 ka pamilya ukon 583 ka mga individuals kag Old Sagay may isa ka pamilya ukon anum ka mga individuals.
Ang mga evacuees ang gindala sa Himoga-an Baybay Integrated Senior High School ang 105 ka pamilya ukon 399 ka mga indibidwal; 14 ka pamilya ukon 47 ka mga individual naman ang gindala sa Itaplan Fundamental Baptist Church samtang 15 naman ka pamilya ukon 51 ka mga indibidwal ang gindala sa Buenaventura Mahilum Annex Elementary School.
23 ka pamilya gindala sa Himoga-an Baybay Barangay kag anum ka pamilya ukon 30 ka indibidwal ang gindala sa Hacienda Sta Maria Day Care Center.
Samtang, 19 naman kapamilya ukon 50 ka indibidwal ang gindala sa PR Katalbas II Elementary School.
Sa San Carlos City, nag-evacuate man ang 96 ka pamilya ukon 327 ka individual sang Barangay Rizal kag gindala sa Greenville Elementary School samtang sa Barangay 1, 19 ka pamilya ukon 75 ka indibidwal ang nag-evaciuate kag gindala sa Ramon Magsaysay Elementary School.
Samtang sa Barangay 5, 61 ka pamilya ukon 211 ka individuals ang nag-evacuate man kag gindala sa Bonifacio Elementary School.
Nakarecord man sang evacuees ang banwa sang Toboso matapos nga 12 ka pamilya ukon 35 ka indibidwal nga residente sang Barangay Tabun-ac ang nag-evacuate sa Don Nicolas A. Lizares Elementary School samtang 33 ka pamilya ukon 118 ka mga indibidwal nga residente sang Barangay Salamanca ang nag-evacuate man sa Salamanca Elementary School kag sa Barangay San Jose 21 ka pamilya ukon 85 ka indibdwal ang nag-evacuate sa Labilabi Elementary School.
Sa syudad sang Escalante, 106 ka pamilya sa kabug-usan ang nag-evacuate, 50 diri ang nagikan sa Barangay Malasibog; 44 ka pamilya nagikan sa Barangay Magsaysay kag pito ka pamilya ang nagikan sa Barangay Jonobjonob samtang lima naman ang nagikan sa Barangay Libertad.
Suno kay Caelian, ginpadulungan man sini ang syudad sang Victorias sa diin may narekord man nga 19 ka pamilya nga ginpang-evacuate apang wala siya sang detalye sang mga residente nagikan sa syudad sang Talisay.
Ginpasalamatan man ni Caelian ang tanan sa pagpangamuyo nga wala natam-an ang probinsya sa epekto sang bagyo kag naghingyo man ini nga pangamuyuan man ang mga residente sang Mindanao kag iban pa nga bahin sang pungsod nga mga naapektuhan sang paglaslas ni Bagyong Auring.
