BACOLOD CITY – Patay ang notoryus nga lider sang hold-up group sa ciudad sang Bacolod matapos gintiro sang pulis nga iya ginhold-up kaina sang kaagahon.
Sa impormasyon nga nakuha sang Bombo Radyo Bacolod, ginhold-up ni Johnny Villarete kag sang duha pa niya ka mga kaupdanan si PO2 Eric Pableo, assigned sa Maritime Command, sa corner CL Montelibano- Capitol Heights sa Barangay Villamonte, Bacolod City, alas-12:30 sang kaagahon.
Sang nanotisyaran sang pulis nga replica lang sang M16 rifle ang gamit sang hold-up group, gilayon sini nga gintiro ang mga hold-upmen gamit ang iya .9mm caliber pistol nga service firearm.
Bangud sa madamo nga igo sa lawas, gilayon nga napatay si Villarete.
Nakapalagyo naman ang duha sini ka mga kaupdanan sakay sang SUV nga getaway vehicle.
Si Villarete ang ginapatihan miyembro sang una sang Cuadra hold-up group apang naghalin ini kag nagtukod sang iya kaugalingon nga grupo nga nagapanghold-up sa Bacolod kag kaiping nga mga ciudad.
Sang tinalikdan nga bulan sang Pebrero, nadakpan si Villarete bangud sa madamo nga warrant of arrest apang temporaryo nga nakahilway matapos magpyansa.
