Yara na sa kustodiya sang mga pulis ang ginatudlo nga lider sang New People’s Army nga nadakpan sang gintingub nga pwersa sang militar kag pulis sa Kabankalan City, Negros Occidental kagab-i.
Sa interview sang Bombo Radyo Bacolod kay 303rd Infantry Brigade commander Brigadier General Benedict Arevalo, ginpahayag sini nga nadakpan si Abraham Villanueva sa Barangay Tampalon, Kabankalan City matapos masundan sang mga otoridad.
Ang pagkaaresto kay Villanueva ang natabo samtang nagapadayon ang clearing operations sa Moises Padilla kasunod sang engkwentro kahapon.
Kaupod ni Villanueva ang duha ka iban pa nga miyembro sang rebelde nga grupo nga ginkilala kanday Rona Magbanua, 18-anyos kag residente sang Brgy. Asia, Hinobaan kag Jomar Villarojo, 28-anyos sang Brgy. Camansi, Kabankalan City.
Si Villanueva suno kay Arevalo ang Front Secretary sang South West Front sang NPA sa Candoni-Hinobaan-Ilog-Cauayan-Kabankalan-Sipalay area.
Ginapahayag nga nagasag-ob ang NPA leader sang nadakpan ini sang mga otoridad kun sa diin nakuha sa posesyon nila nga tatlo ang isa ka .45 caliber pistol, mga granada kag mga bala.
Kaina sang aga, nagpatigayon sang clearing operations ang mga suldado nga nagresulta sa panibag-o nga engkwentro sa Barangay Tampalon.
Suno kay Arevalo, indi magnubo sa 10 ka mga NPA members ang naka-engkwentro sang militar kaina apang wala sang pilason sa tropa sang gobyerno samtang indi pa matumod sa bahin sang rebelde nga grupo.
