BACOLOD CITY – Gin-manduan ni Presidente Rodrigo Duterte si Police Regional Office 6 director Police Chief Supt. John Bulalacao nga i-relieve ang lima ka mga opisyal sang Bacolod City Police Office, lakip na ang pila ka mga opisyal sang Bacolod City.
Sa speech ni Presidente Duterte sa isa ka birthday celebration sang isa ka miyembro sang Yanson family nga ginhiwat sa isa ka kilala nga hotel sa dalan Lacson subong gid lamang nga gab-i, ginpahayag sini nga protektor sang illegal nga druga sanday Police Senior Supt. Francisco Ebreo, OIC City Director sang BCPO; Deputy for Operation nga si Police Supt. Allan Macapagal; Police Supt. Richie Yatar; Police Supt. Nassrudin Tayuan, anay team leader sang City Drugs Enforcement Unit; kag Police Senior Insp. Victor Paulino, anay hepe sang Police Station 3.
Nahibaluan nga yara man sa nasambit nga hotel si Police Senior Supt. Ebreo sang ginlawag sang presidente ang iya pangalan.
Gin-abisohan naman ni Duterte ang mga gin-hingadlan sini, partikular na si Ebreo kag Macapagal nga mag-padulong sa iya sa Malakanyang sa Lunes nga adlaw, Enero 14, las-2:00 sa hapon.
Gin-mensyonar man sang presidente nga yara sa ika-apat ang pangalan ni Councilor Cano Tan sa watchlist sini.
Apang magluwas kay Tan, may yara sang iban pa nga mga opisyal nga gikan sa probinsya sang Negros Occidental ang imbolbado man sa illegal nga druga suno sa presidente.
Nahibaluan nga alas-6:58 sini gid lamang nga gab-i sang naghugpa ang gin-sakyan nga presidential plane ni Duterte sa Silay-Bacolod International Airport, kag liwat nga nag-sakay sa presidential chopper kag naghugpa sa Reclamation Area.
