Ginpasalig sang Bureau of Jail Management and Penology nga nagapadayon ang livelihood programs sang ahensya para sa mga priso.
Sa interview sang Bombo Radyo kay BJMP Region 6 spokesperson Jail Senior Inspector Mark Malhabour, nangin madinalag-on ang paghimo sang persons deprived of liberty sang parol bangud nakabenepisyo ang mga inmates kag ang ila pamilya mismo bangud sila ang nakaincome.
Bangud sini, nagpasalamat si Malhabour sa tanan nga stakeholders nga nagsuporta sa mga PDLs kag nagbakal sang mga parol nga ila nga himo kaangay sang local government units kag private individuals.
Aminado si Malhabour nga dako ang naincome sang mga PDL sa Negros Occidental apang wala sang fixed nga figure sang ila nga income.
Ang income sang mga PDL sa parol ang ginhatag man sa ila samtang ang iban ang gintigana para sa ila nga capital sa masunod nga livelihood program, bangud indi sila allowed nga mag-uyat sang dako nga kantidad sang kwarta sa sulod sang prisuhan.
Suno kay Malhabour, nagapadayon ang iban pa nga livelihood programs sang BJMP kaangay sang crafts program samtang padayon man ang Alternative Learning System sang Department of Education para sa mga wala nakatapos.
Sa karon, wala pa sang nahatagan sang pardon ukon executive clemency sa mga priso sa BJMP bangud kalabanan sa mga priso sa detention facilities sang ahensya ang nagaavail sang plea bargaining agreement.
