BACOLOD CITY — Ginalantaw sang Negrense international designer nga si Kirsten Regalado nga makabato sa question and answer portion ang pambato sang Iceland sa Miss Universe 2017.
Si Regalado nga tumandok sang La Castellana ang nagdesinyo sang national costume ni Miss Universe Iceland Arna Johnsdottir kag ginpatigayon na kaina ang national costume competition.
Sa interview sang Bombo Radyo, ginpahayag ni Regalado nga warrior queen ang theme sang national costume sang Miss Iceland kun sa diin may yara ini sang shield bangud luyag niya nga ipakita ang women empowerment.
Sang Domingo sang aga, oras sa Pilipinas, nagpaindis-indis na ang mga kandidata sa national costume sa Las Vegas bilang kabahin sang Miss U preliminaries.
Si Miss Iceland ang typical nga lin-ay sang amo nga pungsod nga blonde ang buhok, mataas kag athletic.
Sa tion sang costume rehearsal, nakit-an ni Regalado nga maayo man magrampa si Miss Iceland.
Suno diri, mabakod nga kandidata si Arna kag masarangan gid ang question and answer portion bangud maayo ini maghambal sang English.
