Nagsugtanay ang Los Angeles Clippers kag ang kampo ni Terrance Mann para sa tatlo ka tuig nga extension nga nagabalor sang $47 million.
Gin-anunsyar ini sang Clippers sa pagbukas sang training camp subong nga semana.
Bangud sini, mapabilin si Mann sa nasambit nga team tubtob sa 2027-2028 season.
Sang 2019 draft, ginpili sang Los Angeles Clippers si Mann bilang 48th pick kag nagapabilin siya sa nasambit nga team humalin sadto.
Siya ang may average nga 8.8 points per game; 3.4 rebounds per game kag 1.6 assist per game sang nakaligad nga season, nauyatan man sini ang episyente nga shooting percentage nga 51.5 percent.
Siya ang pangatlo nga player sang Clippers nga nagpirma sang deal subong nga offseason kaupod sanday James Harden kag Ivica Zubac.
Ginalauman nga mapun-an ni Mann ang gap nga ginbilin nanday Paul George kag Russel Westbrook.
Si George amo ang nagapirma sang kontrata sa Philadelphia 76ers samtang si Westbrook amo ang nagpadulong sa Denver Nuggets.
