Ginpahayag sang Regional Director sang Land Transportation Franchising and Regulatory Board (LTFRB) sa Negros Island Region (NIR) nga wala ini nakabaton sang opisyal nga impormasyon angot sa gina-alegar nga notice of bankruptcy sang isa ka kooperaatiba sa ciudad sang Bacolod.
Sa interview sang Bombo Radyo kay Atty. Gerry Llena, wala man ini sang may nabaton nga petisyon nga gin-endorso sang Sangguniang Panlungsod sang Bacolod City natuhoy sa kahangawa sang pila ka mga transport leaders sa gina-alegar nga notice of bankruptcy.
Suno diri, kun matood gid man nga namierdehan ang isa ka kooperatiba, ini makabig nga dako nga problema bangod dako ang mangin epekto sini sa mga commuters.
Suno kay Llena, indi dapat matabo nga madulaan sang nagabyahe nga public utility vehicle ang isa ka ruta apang kun bankruptcy ang natabo, mahimo nga internal ini nga problema sang negosyo.
Dugang pa sini, kun indi na makasarang ang kooperatiba mahimo nga makansela ang ila prangkisa.
Apang nagpabutyag si Llena nga indi sini luyag nga malab-ot pa sa punto nga may makansela nga prangkisa amo nga mangita ini sang solusyon agud masolbar ang problema.
