Nagtakop na subong nga adlaw ang workshop sang Land Transportation Office sa mga gindeputize sa pagpanakop sang mga motorista nga nagahimo sang traffic violations.
Sa inteview sang Bombo Radyo Bacolod kay LTO – Negros Island Region Director Jeck Conlu, nagdangat sa masobra isa ka gatos ang nagpartisipar sa Regional Deputation Training Workshop para sa pagpatuman sang land transportation laws kag iban pa nga mga regulasyon.
Ini gikan sa Bacolod Traffic and Transportation Management Department (BTTMD), Highway Patrol Group (HPG) kag kapulisan indi lamang sa Bacolod City, kasubong man sa pila ka banwa kag ciudad sa Negros Occidental.
Suno kay Conlu, gikan mismo sa LTO National Office ang officers nga nagpatigayon sang workshop nga nagsugod sang Pebrero 18 kag nagtakop subong nga adlaw.
Suno diri, may-ara pa sang exam kag field enforcement assessment antes hatagan sang Temporary Operator Permit ukon ID ang mga deputized agents.
Bisan naka-upod sa apat ka adlaw mga workshop kun indi makapasar sa assessment, sila ang indi man pahanugutan sa pagpanakop.
Ang mga deputized agents ang magabulig sa LTO sa implementasyon sang Republic Act 4136 ukon Land Transportation and Traffic Code.
Pahanumdom ni Conlu nga ang LTO ang indi para sa pagpanakop lamang, sa baylo sila ang nagapanakop agud mapanubo ang mga traffic violators nga magaresulta man sang pagnubo sang mga road accidents.
Mensahe naman sini sa mga motorista nga kun ginlapas na ang ila kinamatarong sang mga deputized agents, sila ang sarang makapalab-ot sang reklamo sa LTO-NIR, kag sila ang nakahanda man nga magdisiplina.
