Matapos gintudlo ang ginbilinan sang bangkay, gintudlo man sang suspect sa pagpatay kay Kristine Joy Dignadice kun sa diin sini ginhimo ang krimen.
Sa pagpangusisa sang Bombo News Team, nakilala ang suspect nga si Police Staff Sgt. Enrique Gonsaludo, 43 anyos, kasado kag personnel sang Bacolod Police Station 5.
Sa interview sang Bombo Radyo Bacolod kay Police Regional Office – Negros Island Region Spokesperson Police Lt Col. Joem Malong, gintudlo mismo sang suspect ang mga buka nga bahin sang windshield ukon bintana sang salakyan nga nagalapta sa highway sang Bacolod-Talisay intersecion sang Bacolod-Silay Airport Access Road.
Ginalantaw nga gintiro sini ang biktima nga isa ka single mom.
Kasunod sini, ang kapulisan ang mapatigayon na sang case conferrence sa pagpanguna sang Talisay City Police Station.
Paathag ni Malong nga ang Hinigaran Municipal Police Station ang nagpatigayon sang initial investigation bangod sa Sitio So-ol, Brgy. Gargato, Hinigaran una nakita ang salakyan nga duguon.
Sa Central Ma-ao, Brgy Don Jorge Araneta sa Bago City naman ginhaboy ang bangkay, samtang sa Bacolod-Talisay intersection natabo ang krimen, gani ang Talisay City Police Station amo ang magahandle sa pagpasaka sang kaso.
Pasalig sini nga wala sang pagatabunan ang PRO-NIR bisan pa pulis ang suspetsado.
