Gindayaw sang Choret Corporation ang nangin matawhay kag dasig nga pay-out nga ginpatigayon sang Land Transportation Franchising and Regulatory Board (LTFRB) para sa fuel subsidy sang mga kwalipikado nga drivers sang Public Utility Jeepneys (PUJ), Transport Network Vehicle Service (TNVS), taxi kag iban pa nga service providers sa ciudad.
Sa interview sang Bombo Radyo Bacolod kay Ma. Corazon Ocalinas, secretary sang Choret Corporation, ginpahayag sini nga base sa ila evaluation, nangin “smooth” ang kabug-usan nga proseso sang pay-out.
Suno kay Ocalinas, wala nagtalang-talang ang mga drivers bangod may yara sang nagabulig kag naga-assist sa ila samtang ginapatigayon ang distribusyon.
Dugang pa sini nga ginahimo sang ahensya ang tanan nga pamaagi agud masiguro nga mabaton gid sang mga driver ang bulig nga ginapalab-ot sa ila.
Ginlaragway man sini nga ang lugar amo ang “conducive” bangud mabugnaw kag komportable ang mga nagtililipon nga drivers.
Dugang pa niya, madasig lamang ang hulat sang kada driver, kag nagadangat lamang sang lima ka minutos antes makumpleto ang ila transaksyon.
May ginhatag man nga libre nga ice cream para sa mga early birds.
Ginpahayag ni Ocalinas nga ginhatagan gid sang espesyal nga lugar ang pay-out kag gin-organisar ini sing maayo, rason nga wala nagdinaguso kag nangin sistematiko ang pag-release sang subsidy.
