Dismayado ang traditional jeepney driver bangod sa madugay nga pagpatuman sang rollback sa presyo sang produktong petrolyo sang pila ka gasolinahan, indi kaangay kun may-ara sang fuel price hike.
Sa interview sang Bombo Radyo Bacolod kay Richard Jocson, nagabyahe sang Northbound-Shopping, sila ang temprano pa nga nagbantay sa isa ka fuel station agud makatughong gilayon sang barato nga gatong, apang pasado alas-6:00 na sang aga wala gihapon nagbag-o ang presyo.
Suno kay Jocson, tuman ka dasig sang mga fuel station sa pagbag-o sang presyo kun may-ara sang oil price hike.
Nahibaluan nga P24.94 ang ginpanaog sa presyo sang kada litro sang Diesel subong nga adlaw, P3.41 naman sa gasolina kag P2.00 sa kada litro sang Kerosene.
Apisar sa dako nga pagnubo, amindo si Jocson nga mabug-at gihapon ang ila nga palas-anon.
Suno diri sadto P1,500 ang balor sang ila nga ginatughong sa kada adlaw, apang sa tuman nga pagsaka ini ang nagdangat na sa kapin P3,000.
Sa P24.94 nga buhin sa kada litro sang Diesel, yara gihapon sa P2,500 ang ila nga gastos sa gatong.
Suno kay Jocson, sa byahe halin sa aga tubtob alas-8:00 sang gab-i, swerte na sila kun makapauli sang P500 bangod siya ang nagabayad pa sa arkila sa jeep nga P1,500 kada adlaw.
Apang ginapasalamat man sini ang rollback, bangod magasaka-saka ang income nga mapauli sini sa pamilya.
