BACOLOD CITY — Manubo na ang tsansa nga makit-an nga buhi ang maestra kag habal-habal driver nga namissing matapos nga nahulog sa overflow sang Himogaan River sa ciudad sang Sagay ang motorsiklo nga ila ginasakyan kahapon sang aga.
Ang mga biktima nga sanday Rona Beleganio, 23-anyos, residente sang Sitio Intaplan, Brgy. Himoga-an Baybay kag manunudlo sang Shermanhill Elementary School kag ang nagamaneho sang habal-habal nga si Clodualdo Abisamis, 58 anyos sang Purok Malipayon, Brgy. Baviera sa amu man nga siudad ang nahulog pasado las 7:00 kahapon sang aga.
Suno kay Police Chief Inspector Robert Mansueto, hepe sang Sagay City Police Station, nahulog sa Himoga-an River sa Brgy. Bato ang ginasakyan nga motorsiklo sang mga biktima matapos nga nadanlog.
Padulong kuntani ang mga biktima sa eskwelahan sa diin nagatudlo si Beleganio apang may sugata sa overflow.
Sa baylo nga magpungko kag maghatag sang ligwa sa isa ka motorsiklo suno kay Mansueto, nagdiretso si Abisamis amo gani nga sila ang nadisgrasya.
Suno kay Mansueto, nabaton naman sang pamilya sang mga biktima nga manipis na ang tsansa nga makit-an ang mga ini nga buhi.
Nagpanawagan man ang hepe sang pulis sa mga pumuluyo nga gilayon nga magpahibalo sa ila kun may makit-an nga senyales sang mga biktima sa suba.
