Makaligad ang malapit isa ka tuig, nadakpan na sang mga pulis ang mag-asawa nga nakapalagyo sa anti-drug operation sa San Carlos City, Negros Occidental kun sa diin P72 milyon nga balor sang suspected shabu ang nakumpiskar.
Sa interview sang Bombo Radyo Bacolod sa hepe sang San Carlos City Police Station nga si Police Lt. Col. D’Artagnan Katalbas, nadakpan sanday Armando kag Josephine Paraquelles matapos ginserbehan sang warrant of arrest sa Barangay Palampas, Huwebes nga adlaw.
Ang mag-asawa suno kay Katalbas ang nagapangatubang sang kaso nga paglapas sa Section 5 kag Section 11 sang Republic Act 9165 ukon Comprehensive Dangerous Drugs Act of 2002.
Matandaan nga Agosto 8, 2018, nakapalagyo ang mag-asawa sa buybust operation sang Philippine Drug Enforcement Agency kag PNP sa Barangay Palampas apang nabilin sang mga ini ang 6 kilos nga shabu nga nagabalor sang P72 milyon kag ginakabig nga pinakadako nga operasyon sa Western Visayas.
Kaupod sang mga ini si alyas Potot apang ini ang nakapalagyo kag nagapabilin nga at-large tubtub subong.
Sa karon, priso na sa San Carlos City Police Station ang mag-asawa nga Paraquelles.
