Nagbalik sa sabak sang gobyerno ang mag-asawa sa ciudad sang Himamaylan nga miyembro sang New People’s Army.
Suno sa Negros Occidental Police Provincial Office, ang mag-asawa nga wala na ginhingadlan ang nagsungka sa mga katapo sang Himamaylan City Police Station, 2nd Negros Occidental Mobile Force Company, Provincial Intelligence Unit sang NOCPPO, Philippine Army kag sa Local Goverment sang Himamaylan City sa pagpanguna ni Mayor Rogelio Tongson sang Hunyo 9.
Suno sa mag-asawa, sila ang miyembro sang unit sang NPA nga naga-operate sa Himamaylan kag involved man sa engkwentro batok sa pwersa sang gobyerno sadtong tuig 2019 kag 2022 sa nasambit nga ciudad.
Bangud sa information drive sang mga otoridad kag local government sang Himamaylan angot sa programa sang gobyerno para sa mga anay rebelde, nagsungka ang mag-asawa bitbit ang ila armas.
Suno sa mag-asawa, nakapoy na sila mangabuhi bilang rebelde.
Ginpasalamatan naman ni NOCPPO director Police Col. Leo Pamittan ang desisyon sang duha nga makabig na sa karon nga peace advocates.
Gin-engganyo man ni Pamittan ang mag-asawa nga kumbinsihon ang nabilin nga kaupod sa hublag nga magbalik na sa sabak ang gobyerno bangud madamo sang programa ang gobyerno para sa ila.
