Napasakaan na sang kaso ang mag-iloy nga nagbuno-patay kay Police Master Sergeant Davy Carampatana, kag pagkasamad sang duha ka police personnel sa La Castellana Municipal Police Station.
Sa interview sang Bombo Radyo Bacolod kay Police Captain Judesses Catalogo, spokesperson sang Negros Occidental Police Provincial Office, ginfile nila alas-7:00 sang aga kahapon sa Prosecutor’s Office paagi sa inquest proceedings ang kaso nga murder, frustrated murder kag paglapas sa section 5 kag 11 sang Republic Act 9165 (Comprehensive Dangerous Drugs Act of 2022) kay Edward Acupan.
Samtang ginpasakaan naman sang kaso nga frustrated homicide ang iloy sini nga si Delia Acupan nga nagbulig sa pagpamuno.
Madumduman nga napatay si Carampatana matapos magbato sa drug buybust operation sa Sitio Talaptap, Brgy Talaptap, La Castellana gamit ang patalom, samtang nag-agom man sang multiple stab wounds si Police Captain Michael Muñez, deputy chief of police sang La Castellana Municipal Police Station; kag minor injuries naman kay Police Corporal Gerson Guache.
Ang iloy ang ginkasuhan matapos nga ini ang nag-intra sa pagpamuno kay Muñez.
Suno kay Catalogo, yara gihapon sa hospital arrest si Edward, samtang ang iloy ang nakahunong naman sa La Castellana Municipal Police Station.
