Natalana nga pasakaan sang kaso ang mag-live in nga nakuhaan sang masobra sa P2 million nga balor sang illegal nga druga sa drug buybust operation nga ginpatigayon sang Bacolod Police Station 4 sa Pallochina Street, Capitol Heights 2, Barangay Villamonte, Bacolod City, kahapon sang kaagahon.
Ang mga suspetsado ang ginkilala nga sanday John Matthew Genon, 21 anyos kag Laurrianne Libre, 25 anyos, lunsay wala sang trabaho kag residente sang Purok Ylac, Barangay 1, Bacolod City.
Nakumpiskar sa duha ang kapin sa 420 grams sang suspected shabu nga ginabanta nagabalor sang P2,856,000.
Ang duha ka suspetsado ang magapangatubang sang kaso sa pagbayolar sa Section 5 kag 11 sang Republic Act No. 9165 ukon Comprehensive Dangerous Drugs Act of 2002.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 4, ginahibalo pa sang mga kapulisan kun sa diin nagakuha ang duha sang supply sang illegal nga druga.
Suno kay Depasucat, wala man sila nakibot sa kadakuon sang nakumpiskar kag nakabaton naman sila sang impormasyon nga dako man ang volume nga nagabaligya sang mga ini.
Suno sa station commander, ginahulat pa nila ang resulta gikan sa crime laboratory agud mahibaluan kun ang duha ang nagagamit man sang illegal nga druga magluwas sa nagabaligya.
Ginpahayag man sini nga madanlog man ang mga suspek bangud nasaylo-saylo ang mga ini sang puluy-an.
