Patay ang duha ka mag-utod nga lalaki matapos makuryente samtang nagakay-o sang linya sang kuryente sa Caloy’s Grille sa Don Pedro Yulo Street, Barangay San Pedro banwa sang Binalbagan, Negros Occidental kahapon sang hapon, Hunyo 2.
Ginkilala ang mga biktima nga sanday Dexter Grijaldo, 45-anyos, kasado kag Rollan Grijaldo, 48-anyos, kasado kag lunsay mga residente sang Barangay Sto.Rosario banwa sang Binalbagan.
Sa interview sang Bombo Radyo Bacolod kay Police Executive Master Sergeant John Batadlan, Chief Investigator sang Binalbagan Municipal Police Station, ang duha ang may ginakay-o sa isa ka kalan-an sa Binalbagan Proper.
Suno kay Batadlan, si Dexter ang una nga nakatandog sang open live wire sa isa ka canopy sang nasambit nga kalan-an kag pagkakita ni Rollan nga nakuryente ang utod sini nagtuyo ini nga buligan apang siya ang nakuryente man.
Ang duha ang gintinguhaan pa nga dal-on sa infirmary sa banwa sang Binalbagan apang gindeklarar nga dead on arrival.
Ang duha ang nagakay-o sang mga suga sang tagsa ka mga canopy sang kalan-an.
Ginalantaw naman nga may settlement na nga matabo sa tunga sang pamilya sang mga biktima kag tag-iya sang kalan-an bangud magparyentahanay man ang mga ini.
