Gin-alegar nga ginhold-up ang duha ka pamatan-on sa bahin sang Barangay Alangilan, Bacolod City samtang nagalantaw sila sang city lights alas 12:59 kahapon sang kaagahon, Pebrero 3.
Ang mga biktima amo ang isa ka 22 anyos nga lalaki kag iya nobya nga 19 anyos nga babayi, lunsay mga estudyante.
Sa interview sang Bombo Radyo Bacolod kay Police Captain Ramie Sayson, Officer in charge sa Bacolod Police Station 5, ang duha ang nagkadto lamang sa lugar agud maglagaw kag maglantaw sang city lights.
Suno diri, samtang nagapundo ang duha sakay sang ila Yamaha Aerox, ginpalapitan sila sang tatlo ka suspek nga naka-bonet kag gintayaan sang wala pa nahibaluan nga calibre sang armas.
Nakuha sa mga ini ang duha ka cellphone, kag gintaban man ang ila nga motorsiklo.
Padayon ang imbestigasyon sang kapulisan, kag ipalantaw man sa mga biktima ang mga CCTV footage sa palibot sang lugar agud makilala ang mga suspek.
Ginapahanumdom sang kapulisan ang publiko nga maghalong ilabi na kon magkadto sa madulom nga lugar.
