Masobra P2.8 million nga balor sang suspected shabu ang narecover sang mga otoridad sa subject sang drug buybust operation nga ginpatigayon sa Camella Bacolod South sa Barangay Tangub kahapon sang hapon.
Ginkilala ang mga nadakpan kanday Richard Monton 42, anyos kag residente sang Villa Esperanza, Barangay Tangub, Bacolod City kag iya live-in partner nga si Jenimar Garcia sang Purok Kaingin, Barangay Sincang Airport, Bacolod City, apang sila ang nagarenta sang balay sa Camella Bacolod South.
Matapos nabaklan sang shabu nga nagabalor sang P13,000, narecover sa mga ini ang 420 grams nga suspected shabu kag ginabanta nagabalor sang P2,856,000.
Ang buybust operation ang ginpatigayon sang Regional Drug Enforcement Unit (RDEU) 6 kag Philippine Drug Enforcement Agency (PDEA) 6.
Sa interview sang Bombo Radyo Bacolod kay Police Captain Ryan Inot, team leader sang Regional Drug Enforcement Unit Region 6, si Monton ang ginakabig nga high value individual kag ini ang napriso na sadto bangud man sa illegal nga druga apang nak gwa matapos nga makapiyansa.
Suno kay Inot, si Monton ang number 8 sa provincial target list sang mga Philippine National Police kag Philippine Drug Enforcement Agency (PDEA-6) A kag ginapahayag nga nagasupply sang illegal nga druga sa ciudad kag banwa sa probinsya sang Negros Occidental.
Aminado si Inot nga nabudlayan ang mga ini sa pagpatigayon sang buybust operation bangud sa security sang nasambit nga subdivision, apang sa bulig sang community natigayon ini kag nadakpan ang madugay na nila nga ginamonitor nga drug personality.
Samtang ang napulo ka tuig nga bata sang maglive-in ang ginturn-over naman sa tiya.
Samtang, ginpahayag naman ni Richard nga nakibot siya sang natabo kag wala siya makahibalo kun sa diin naghalin kag paano narecover sa ginarentahan nila nga balay ang halos ΒΌ kilos nga suspected shabu.
