Tubtob sa karun wala pagid makita ang mangingisda nga namissing sa lawod sang Silay, Negros Occidental sang Marso 17 sang kaagahon.
Sa interview sang Bombo Radyo Bacolod kay Coast Guard Ensign John Hoffer Olis, public information officer sang Philippine Coast Guard Northern Negros Occidental, padayun ang pagpatigayon sang search and rescue operations sang PCG upod sa Bantay Dagat kag pila ka mga volunteers kalakip na ang mga kaupod man nga mangingisda sang biktima.
Suno diri, ang biktima nga si Eddie Flores, 38 anyos, residente sang Barangay Punta Taytay, Bacolod City ang nagpadulong sa kadagatan sa boundary sang Talisay kag Silay City upod sa tatlo sini ka abyan nga sanday Marcelo Perez, Joshua Recomono kag Niño Englatera.
Suno kay Olis, ginsugilanon na nila ang pamilya sang biktima kasubong man ang apat sini ka kaupdanan sa pagpangisda.
Ang apat ang nahibaluan nga naglayag Marso 16 alas-11:00 sang gab-i apang sang magapauli na kuntani alas-4:00 sang kaagahon, Marso 17, wala na makit-an si Flores.
Ginalantaw nga ini ang mahimo nahulog bangod sa matag-as nga mga balod, apang bangod nagadalagan ang pump boat, ini ang wala nila makit-an apisar nga ginsuli na ang ila nga ginlabayan.
Ginpatay man nila ang makina sang pump boat bangod ini ang magahod sa paglaom nga mabatian kun nagapangayo sang tabang si Flores.
Apang nalab-utan na sang gab-i wala nila gihapon nakita ang abyan, gani sila ang nagbalik na sa Brgy Punta Taytay kag nagapangayo sang bulig sa PCG.
Ang mga mananagat ang nagkuha man sang kaugalingon nga pump boat agud magbulig sa pagpangita sa ila namissing nga abyan.
Suno kay Olis, nakadangat na sila sa kadagatan sang Guimaras kag Iloilo sa pagpangita bangod didto padulong ang huyop sang hangin.
Magluwas diri, ginpaalinton naman nila sa iban pa nga Coast Guard substations ang impormasyon partikular na sa mga nagapatigayon sang Coastal Security Patrol kag sa iban pa nga mga mangingisda.
