Aminado ang Chairman sa MANIBELA nga madamo sang mga unconsolidated traditional jeepneys ang nag-untat na sa pagbyahe apisar nga wala pa sang reported nga gindakop.
Sa interview sang Bombo Radyo Bacolod kay Mar Valbuena, makaluluoy ang sitwasyon sang mga commuters kun sa diin madamo sang mga nagakastranded.
Pahayag sini nga may mga empleyado nga nagagwa sa trabaho alas-5:00 sang hapon apang alas-3:00 sang kaagahon na makapauli bangod sa wala sang masakyan.
Panindugan ni Valbuena nga ang pagpamahog sang Land Transportation Franchising and Regulatory Board (LTFRB) kag Department of Transportation (DOTr) sa pagpanakop ang indi lamang nagapatay sa mga drivers kag operators kag sa ila pamilya kundi subong man nagahalit sa mga commuters.
Pahayag ni Valbuena nga sa karun iya ang nagahulat sang hearing sa Kongreso, kag nagalaom nga mabatak ang mandato.
Apisar nga wala pa sang mandato sa pagpanakop, madamo ang indi magrisgo sa pagbyahe bangod sa tuman ka mahal nga penalidad. Kun sa diin sa Bacolod City pa lamang yara na sa tres mil ang mga indi na makabyahe.
Panindugan sini nga bayolasyon sa layi ang indi paghatag sang prangkisa bangod lamang wala nagsulod sa consolidation.
Pahanumdom sini nga ang paggrant sang franchise ang isa ka layi, apang ini ang ginsapawan sang memorandum circular lamang ukon pag-issue sang provisional authority.
Wala nagakadulaan sang paglaom si Valbuena nga sila ang pamatian sang Kongreso kag magahimo sang committee report kag resolution nga magahatag sa ila sang tyansa nga liwat makabyahe.
Wala naman sang pulos para sa iya ang Korte uprema bangod ini ang nagapabor lamang sa mga yara sa puder kag wala ginalantaw ang sitwasyon sang pumuluyo.
