Kaangay nga nagbalik ang kondisyon ni Filipino boxing legend Manny Pacquiao sang siya ang lamharon pa suno sa iya nga coach.
Sa interview sang Bombo Radyo Bacolod kay Sports Analyst Monico “Nukes” Puentevella, derekta sa Las Vegas Nevada, kahapon lang sila nagkit-anay nanday pacquaio kag ini ang una nga kahigayunan nga nakita sini nga dala sang 8-division Champion ang iya mga kabataan sa hampang.
Kada adlaw antes ang hampang, si Pacquaio ang nagapatigayon man sang prayer meeting, nga kustombre na sini humalin pa sadto.
Sa pagsugilanon niya kay coach Buboy Fernandez, trainer ni Pacquiao, bisan siya ang nakibot sa kondisyon sang Pambansang Kamao nga kaangay nga nagbalik sang ini ang yara sa iya peak condition.
Ginpanugyan sini nga dapat mapatulog ni Pacquaio ang kasumpong nga si American Boxer Mario Barrios antes ang round 5, bangod bilang isa man ka anay boksidor, ginalantaw sini nga magaluya na si Pacquiao sa paglawig sang hampang.
Suno kay Puentevella, maragtason kun madaog ni Pacquaio ang hampang kag ini ang mahimo kilalahon nga greatest boxer in the world, ilani na nga ini ang 46 anyos na batok sa 30 anyos nga World Boxing Council (WBC) Welterweight World Champion.
Dugang pa sini nga indi exhibition match kundi title fight, samtang bisan ang anay kasumpong sini nga si Mexican boxer Juan Manuel Marquez ang nagapati nga magadaog si Pacquiao bangod sa experience.
Sa karun nagdikit naman ang betting odds kun sa diin ang anay 3-1 odds pabor kay Barrios ang nanaog sa 2-1 odds.
