Ginapanindugan sang mga tenants sa Manokan Country nga indi sila maghalin sa ila nga pwesto kun wala sang court order.
Una na nga ginpahayag ni Bacolod City Mayor Alfredo ‘Albee’ Benitez nga wala na sang ihatag nga extension kag siraduhan na ang Manokan Country sa Hulyo 5 agud madayon ang renovation project sang SM Prime Holdings Inc.
Hugot ang pagpamatok sang Manokan Country Vendors Association kag sa 24 ka mga vendors, 23 diri ang luyag nga magcontest sa pagpatuman sang ciudad pinaagi sa ila legal counsel nga sanday Atty. Jomax Ortiz kasubong man Atty. Brix Reyes sang Task Force Kasanag.
Martes nga adlaw, ginpuno sang mga ini sang tarpaulin ang atubang sang Manokan Country kun sa diin nakasulat ang ila pagpamatok sa programa.
Sa statement ni Tes Umbao Mondres, isa sa mga stall owners, ang Manokan Country ang naga-upod sa beautification project sang Benitez administration, apang sila ang nagaka-ipit sa kontrata sa tunga sang ciudad kag sang pribado nga sektor.
Panindugan sang mga ini nga kuntani magpatigayon lamang sang renovation sa ginakabig cultural heritage kag indi pag-ihatag ang pagdumala sa pribado nga kompanya.
Samtang kun sila naman ang irelocate, nagapangabay ang mga ini nga sila ang ulupod gihapon sa lugar nga matawag Manokan Country.
Madugay naman sila nagalaom nga patahumon man sang ciudad ang ila pwesto ukon kay-uhon ang busluton nga atop bangud ini ang ila man nga kinamatarong ilabi na nga masobra tunga sa mga vendors ang nagabayad man sang arkila kay diutay lang ang may arrears.
Apang bangud wala ginpamatian ang ila concerns, sila ang nagdangop na sa legal counsel para sa legal remedies.
