Ginpaidalom na sa inquest proceedings si Police Staff Sgt Bonifacio Saycon sang Sibulan Municipal Police Station kahapon sa Negros Oriental.
Madumduman nga sang Biyernes alas- 09:35 sang gab-i, yara sa SAB Resto Bar sanday Police Captain Jose Edrohil Cimafranca, hepe sang Sibulan Municipal Police Station; Police Senior Master Sgt Tristan Chua; Patrolman Rey Albert Temblor; kag Police Staff Sgt Bonifacio Saycon.
Nag-inom inom ang mga pulis sa pagselebrar sang kaadlawan ni Cimafranca kun sa diin may yara sila sang gin-table nga si babayi nga si Chiela Mae Dinawanao.
Sa CCTV footage sang Resto Bar, nakit-an nga nagpungko si Dinawanao sa tupad ni Cimafranca kag nagtindog si Saycon kag gintiro si Dinawanao.
Naggwa si Saycon apang nagbalik ini kag ginluthang sa ulo si Dinawanao.
Amo pa lang nga nagreact ang tatlo ka pulis nga kaupod ni Saycon kag nag-upod sa suspek papagwa sa Resto Bar.
Nagsakay ang mga pulis sa salakyan ni Cimafranca, apang gintiro man ni Saycon ang tatlo ka kaupod sini nga pulis.
Gilayon nga nalagyo si Saycon apang nagsurrender man sa Tanjay City Police Station alas-10:40 sang gab-i.
Suno kay Negros Oriental Police Provincial Office Spokesperson Police Captain Stephen Polinar, ginpaidalom na sa inquest proceedings si Saycon sa Provincial prosecutors office sa Barangay Piapi, Dumaguete City.
Suno diri, sa inisyal multiple murder ang kaso nga ginpasaka batok kay Saycon.
Ginpaidalom man sa drug test, paraffin test kag iban pa si Saycon.
Samtang narecover sa suspek ang 9mm kag .45 calibre pistol nga ginpaidalom man sa ballistic examination.
