Lauman gihapon ang manual load dropping ukon rotational power interruptions kasunod sang pagdeklarar sang National Grid Corporation of the Philippines (NGCP) sang yellow kag red alert status sa Luzon kag Visayas grid.
Sa interview sang Bombo Radyo Bacolod kay Michelle Visera, public relations officer sang NGCP-Negros Island Region, ang nagakatabo nga brownout ang indi lamang nagakabatyagan sa Negros kundi sa bilog nga Visayas.
Ang yellow alert status ang nagaserbe nga warning nga manipis na lamang ang power supply kag indi na makasarang sa kadakuon sang demand.
Samtang sa red alert status, lauman na ang rotational power interruptions, agud balanse nga macater ang mga power consumers.
Paathag ni Visera nga ang pagnubo sang power supply ang masami tuga sang pagdisconnect sang power plant sa system sang NGCP.
Ini na ang ikatatlo nga semana, kun sa diin mas nagdamo pa ang power plant nga nagdisconnect.
Sa karun, wala pa sang napagwa nga rasun sa disconnection, apang pasalig ni Visera nga sa tion nga makabalik na ang koneksyon kag may mahaboy na nga power supply ang power plants, ini ang gilayon man nila nga idistribute sa mga power distribution utilities ukon mga electric cooperatives.
Suno kay Visera, sa gipagwa NGCP announcement, yara sa red alert status sa Visayas alas-5:00 sang hapon tubtob alas-9:00 karun sa gab-i.
Apang ang mga electric cooperatives na ang nagadisedir kun diin nga area ang patigayunan sang power interruption.
Panugyan ni Visera sa mga konsumedor nga magsave sang kuryente partikular na sa mga kritikal nga inoras.
