Patay ang manugbaligya sang karne kag baboy matapos ginluthang sang lima ka armado nga mga persona nga nagpakilala nga mga katapo sang New People’s Army sa Sitio Kamao, Brgy. Marcelo, Calatrava.
Sa interview sang Bombo Radyo kay Police Major Lumyaen Lidawan, hepe sang Calatrava Municipal Police Station, ginkilala ang biktima kay Rodel Nobleza, 37-anyos, residente sang Barangay Suba sa nasambit nga banwa.
Padulong kuntani si Nobleza sa ginabaklan sini sang mga sapat nga pagakatayon kag ibaligya ang karne, kaupod ang duha ka mga menor-de-edad, sang sila ang ginsugata sang lima ka mga armado nga mga persona nga may bitbit m16 rifle nga armas.
Ginpatalikod sang mga ini ang duha ka mga kabataan nga naga-edad 17 kag 16-anyos kag ginluthang si Nobleza.
Nakaangkon ini sang igo sa ulo, dughan kag tiyan kag ginhingagaw pa dala sa ospital apang gindeklarar na nga dead on arrival.
Apisar nga madutay lamang ang tawo sa lugar sang insidente suno kay Lidawan, may witness naman nga nakakita sa krimen kag nagpahayag nga ang mga suspetsado mismo ang nagpakilala nga sila ang katapo sang makawala nga grupo.
Ginaalegar nga asset sang Philippine Army ang biktima apang sa pahayag sang mga militar, indi ini matuod.
Sa karun ginahibalo pa sang mga otoridad ang rason kun ngaa ginpatay si Nobleza kasubong man ang pagpangita sa mga suspestado.
