Desidido nga magpasaka sang kaso ang manunudlo batok sa iya bana nga pulis nga natiro sa iya sa Barangay Ayungon, banwa sang Valladolid, Negros Occidental sang Pebrero 11, 2025.
Sa interview sang Bombo Radyo kay Police Captain Bonifacio Galvez Jr., Deputy Chief of Police sang Valladolid Municipal Police Station, ang biktima ang ginkilala nga si Alias Lauerece, 37 anyos, nagatrabaho bilang manunudlo samtang ang bana naman sini amo si Police Corporal Alias Jomie, 33 anyos, miyembro sang Philippine National Police nga na-assign sa Malay Municipal Police Station sa Aklan Police Provincial Office.
Suno kay Galvez, alas- 11:20 sang gab-i sang Martes, naga-inom inom si Alias Jomie kaupod ang amay sang iya asawa.
Sa panaysayon ni Alias Lauerece, nagsulod sa ila kwarto ang iya bana kag naghanda na magtulog na apang gulpyada lang nagbangon si Alias Jomie kag ginkuha ang iya issued firearm.
Ginpasiga sang biktima ang suga kag nakita nga nakatutok sa iya ang armas-luthang nga gina-uyatan sang iya bana.
Suno kay Galvez, dali-dali nga maggwa kun tani sa kwarto si Alias Lauerece apang paghana sini nga maggwa kag sirad-an ang puwertahan ginpalupok ni Alias Jomie ang iya armas-luthang.
Nadaplisan sa butkon ang biktima nga gindala sa Don Salvador Benedicto Memorial District Hospital.
Samtang si Alias Jomie naman ang yara sa kustodiya sang Valladolid Municipal Police Station.
Desidido sa karun ang asawa nga pasakaan sang kaso nga frustrated parricide ang iya bana nga police.
Si Alias Laurece kag Alias Jomie ang may duha ka bata nga naga-edad sang 13 anyos kag isa ka baby nga nakaligad lang ginbun-ag.
