Apat ka mga pasidungog bilang “global excellence awardee” ang nabatun sang isa ka Bacolodnon nga manunudlo gikan sa isa ka International Competition.
Sa interview sang Bombo Radyo Bacolod kay Dr. George Dela Cruz, manunudlo sa senior high school sang Handumanan National High School, wala siya nagalaom nga madala sa maghatagan sang pasidungog bangod madamo nga mga pungsod ang nagpasa sang requirement agud makigbahin sa nasambit nga kompetisyon.
Nagserbe naman nga passport sini agud ma qualify amo ang pagbatun sang International Internship University Award tinalikdan nga tuig.
Paathag ni Dela Cruz nga bangod “educators” ang category nga ginpasakupan sini, sila ang ginpapasa sang mga requirements nga ginalakipan sang portfolio, curriculum vitae kag ila mga achievements samtang may ginpatigayon man nga screening kag online interview sa atubang sang pila ka mga panels.
Makaligad sang duha ka semana, nakabatun ini sang email nga nagapahibalo nga siya ang nakasulod sa finals, tubtob sa nakabatun na sang notice nga siya ang napilian nga magabatun sang apat ka mga trophy’s.
Suno kay Dela Cruz, apat lamang ang ginpadala sini para sa kompetisyon indi kaangay sa iban nga partisipante nga nagadangat sa pito ukon walo.
Isa sa ginalantaw sini nga nangin lyabi agud nga siya ang mapilian amo ang koneksyon sini sa United Nations Educational, Scientific and Cultural Organization (UNESCO) kun sa diin siya ang isa ka advocate kag mentor.
May kaangtanan man sa UNESCO ang nabatun sini nga award sang Desyembre 12, 2021 sa International Organization of Educators and Research Incorporated nga ginlakip man sini sa ginpasa nga achievements.
Sadto, natuhoy sa community kag innovation ang iya nga nadag-an nga gina-angot man sini sa iya teaching performance, implementasyon kag kolaborasyon sa nagkalainlain nga ahensya sang gobyerno nga nagresulta agud nga siya ang magdaog sang international awards.
Paathag ni Dela Cruz nga ginalakip sini sa lesson plans para sa pagtudlo sang science sa 21st history literature, ang iya nangin exposure sa UNESCO nga nagatuyo sa pagpasanyog pa sang Global Citizenship Education.
Suno diri, luyag niya nga malocalize ang pagtudlo sa dalagan sang kalibutan, ilabi na sa bahin sang ekonomiya kag environment.
Aminado man ini nga may kakulangan ang curriculum sang Pilipinas sa nasambit nga factors nga tuga sang madamo nga rasun kaangay sang over-crowding sang mga estudyante sa isa ka classroom kag tuman ka damo nga load sang mga manunudlo.
Apang bangod sa siya ang advocate, ginapangitaan gid sini sang paagi nga makatudlo sa mga kabataan bangod siya ang nagdako man gikan sa slum areas kag nakita gid sini ang kabudlayan sa sosyodad.
Bangod sa epekto sang climate change, paathag sini nga ang mga magagmay nga pungsod kaangay sa Pilipinas ang labi nga nagaka-apektuhan gani ginatudlo sini sa mga kabataan ang dapat nga pag-ulikid sa dunang manggad.
