Nagtipon man ang Maranao Community sa Bacolod City Public Plaza kaina sang aga sa pagsaulog sang Eid’l Fitr ukon ang Festival of Breaking the Fast.
Sa interview sang Bombo Radyo Bacolod kay Ustadh Yacob Abdulah, Immam sa Maranao Community, sila ang nagtipon agud magpangamuyo sang pagpasalamat sa paglampuwas sa isa ka bulan nga pagpuasa.
Ang prayer ang nag-umpisa alas-6:00 sang aga kag natapos alas-7:00 sa aga.
Matapos ang pangamuyo, sila ang nagabisita sa mga abyan nga Muslim bilang pagpakita sang selebrasyon.
Aminado ini nga isa sa kabudlayan sa tion sang fasting kun sa diin sila ang indi makakaon kag maka-inom sang tubig alas-4:00 sa aga tubtob alas-6:00 sa gab-i, amo ang mga tion nga sila ang makalabay sa mga tawo nga nagakaon ukon makalabay sa mga ginabaligya nga pagkaon.
Apang ini ang ila na lamang nga ginapakigbatuan pinaagi sa hugot nga pagtuo.
Ginapasalamat sang mga ini nga natapos nila ang bulan sang Ramadan nga wala makasala.
Sa pihak sini, may mga ginahatagan man sang exception sa fasting kaangay sang mga nagabusong, kasubong man ang mga nagamasakit kag may menstrual period.
Apang paathag ni Abdulah, nga sarang pa makabawi sang mga wala makapatigayon sang fasting sa Ramadan ang pagpuasa sa mga masunod nga binulan.
