Gintutukan sang mga Pilipino ang ikatatlo nga State of the Nation Address ni President Bongbong Marcos nga naglawig sang isa ka oras kag 22 minutos kag 122 ka beses nga ginpalakpakan sang mga nagtambong kun sa diin madamo man ang ila ginhatag nga standing ovation.
Ang speech sang presidente ang nagsentro sa agrikultura, presyo sang bugas, KADIWA stores, farm to market roads, West Philippine Sea kag iban pa.
Diri man gin-anunsyar ni Marcos Jr. ang pagdumili sang tanan nga Philippine offshore gaming operators sa pungsod.
Suno kay Marcos, ang POGO operations ang imbulbado sa ginadumilian nga mga butang kaangay sang financial scamming, money laundering, prostitutions, human trafficking, kidnapping, torture, kag murder.
Suno diri, ang tuman nga abuso kag indi pagrespeto sa systema kag layi sang pungsod ang dapat mauntat.
Kinahanglan nga mauntat ang paggamo sang mga ini sa atun sosyodad kag pagbaboy sa atun pungsod.
Dugang pa sang presidente, epektibo kahapon, ang tanan nga POGO ang banned na.
Ginmanduan man sini ang Department of Labor and Employment nga pangitaan sang bag-o nga trabaho ang mga Filipino nga madulaan sang trabaho.
Kasubong man, gin-instructionan sini ang PAGCOR nga untaton na ang tanan nga operasyon sang POGO sa katapusan sang tuig.
Sang nakaligad nga semana, ginrekomendar ni Finance Secretary Ralph Recto ang total ban sang operasyon sang POGOs bangud sa mga issue nga nakapalibot sa industriya.
Ini ang kadungan sang reklamo sang publiko kasunod sang asod-asod nga raids batok sa mga establishmento nga nangin palaagyan sa pagdiskubre sang torture, love scams, kag criminal activities.
Samtang, ang Association of Service Providers and POGOs (ASAP) ang nagpaandam nga kapin 23 mil ka mga Filipino ang madulaan sang trabaho kun ang sa operators ang banned ukon dumilian sa pungsod.
Suno pa kay Marcos, ini ang magaresolbar sang madamo nga problema nga ginapangatubang na apang indi man masolbar ang tanan nga problema.
Agud nga masolbar ang tanan nga problema nga ginapangatubang, ang tanan nga mga opisyales, law enforcers, nagatrabaho sa gobyerno kag ang mga pumuluyo, ang dapat vigilant, principled kag paminsaron ang makapamaayo sa pungsod.
