Arestado ang mag live-in nga mga anay preso sa buy-bust operation sang City Drug Enforcement Unit sang Bacolod City Police Office sa Teres 2, Barangay Taculing, Bacolod City, kahapon, sang kaagahon.
Ang mga nadakpan amo sanday Joeford Sancho, alias “Pol-pol”, 41-anyos, kag Miyuki Dazo, alias “Miyuki”, 28-anyos, lunsay wala sang trabaho kag residente sang nasambit nga lugar.
Sa interview sang Bombo Radyo kay Police Captain Joven Mogato, pinuno sang City Drug Enforcement Unit, tuig 2015 sang napreso si Miyuki angot sa illegal nga druga, apang sang tuig 2022 naman magka-upod ang duha nga napreso may kaangtanan man sa illegal nga druga.
Nakumpiskar sa duha ang kapin sa 110 ka gramos sang suspected shabu nga may standard drug price nga P748,000.
Suno kay Mogato, padayon sa karun ang background checking sa duha samtang sila ang magapangatubang sang kaso nga paglapas sa section 5, 11, kag 26 sang RA 9165.
