Bilang kabahin sang pagpatuman sang Public Utility Vehicle Modernization Program, nagbiyahe na ang indi magnubo sa 25 units sang modernized jeepney sa syudad sang Bacolod kaina sang aga.
Sa interview sang Bombo Radyo Bacolod sa driver nga si Felix Vaflor, P13 ang minimum fare sa modernized jeepney sa una nga apat ka kilometro apang may yara sang dugang kun maglampas na diri.
Suno kay Vaflor, sang una driver man ini sang traditional jeepney apang nagsaylo ini agud matestingan ang pagdrive sa modernized jeepney.
Suno diri, ang pagdrive sa modernized kag traditional jeepney ang pareho lamang apang ang kinalain fixed ang bayad sa ila nga P450.00 kada adlaw kag may yara pa sang overtime nga apat ka oras.
Makaakomodar sang 30 ka mga pasahero, 20 sa seating capacity samtang napulo naman ang standing.
Indi man makacutting ukon makaliko sa tion nga may yara sang pasahero bangud dapat nga sundon ang nakasaad sa routa.
May yara man sila sang kaugalingon nga paradahan bangud indi man sila mahimo nga magpundo sa terminal.
Ang modernized jeepney ang ginbutangan man sang konduktor agud nga magpanukot sang biyahe.
Suno kay Vaflor, wala man sila ginhatagan sang quota bangud ginapanilagan pa sa karun ang dalagan sang ila nga biyahe.
Ginpasiguro man ang seguridad sang mga pasahero bangud may yara sang cctv cameras kag dash cam.
