Indi magnubo sa 200 ka nagkalain-lain nga sahi sang armas ang ginsungka sang Tabara-Paduano Group sang Rebolusyonaryong Partido ng Manggagawa ng Pilipinas/Revolutionary Proletarian Army-Alex Boncayao Brigade (RPM-P/RPA-ABB) kahapon.
Sa interview sang Bombo Radyo Bacolod kay Negros Occidental Police Provincial Office spokesperson Police Major Edison Garcia, ginabanta nga nagadangat sa 200 tubtub 250 ka short kag long firearms ang kabug-usan nga ginturn-over sang grupo sa gobyerno kadungan sang seremonya nga ginpatigayon sa nagkalain-lain nga bahin sang Negros Occidental.
Magluwas sa mga armas, may ginturn-over man nga eksplosibo kag mga ammunitions.
Ini ang kabahin sang nagapadayon nga peace talks sa tunga sang Tabara-Paduano Group kag sang gobyerno paagi sa Office of the Presidential Adviser on Peace Process (OPAPP) kun sa diin nakasugtan nga idecommission ang mga armas sang ila mga miyembro.
Suno kay Garcia, madugay nga proseso ang ginlabayan kun sa diin ginpaidalom pa sa validation ang mga armas kag natigayon ang decommissioning.
Nagbulig man diri ang Philippine National Police kag ang Philippine Army nga amo ang nag-secure sang mga armas nga ginturnover.
Nagapati ang NOPPO nga handa ang Tabara-Paduano Group sang Rebolusyonaryong Partido ng Manggagawa ng Pilipinas/Revolutionary Proletarian Army-Alex Boncayao Brigade (RPM-P/RPA-ABB) nga malab-ot ang kalinong sa probinsya gani ginsungka sang mga ini ang ila mga armas, eksplosibo kag ammunitions kahapon.
Suno kay Garcia, boluntaryo ang pagsungka sang grupo sang ila armas gani pamatuod lamang ini nga handa sila nga malab-ot ang tinutuyo sang peace talks sa gobyerno.
Sa ciudad sang Cadiz, nagadangat sa 36 ka mga armas ang ginsungka apang isa lang ang nasambit nga ciudad nga ginpatigayunan sang seremonya kahapon bangud simultaneous ukon dululungan ini nga ginhiwat sa iban nga peace and development communities sang RPA sa northern kag southern Negros.
Samtang may yara man sang kaangay nga programa sa iban nga parte sang pungsod.
Suno kay Garcia, prelude ukon panugod na ini sang kampanya sang gobyerno nga matapna ang mga local terrorists.
Nagalaom man ini nga mangin palaanggiran ini sang New People’s Army kag ila man nga sundon.
