Masobra P200,000 nga balor sang illegal nga druga ang nakumpiskar sa duha ka mga persona sa buybust operation nga ginpatigayon sang City Drug Enforcement Unit (CDEU) sa Purok Matahom, Barangay Tangub, Bacolod City.
Suno kay CDEU Head Police Lt. Joven Mogato, ang subject person nga si William Cabiles, 31 anyos, residente sang nasambit nga lugar, ang may kaangtanan kay Remar Mosquida nga una na nga nadakpan sa buybust operation sang Bacolod Police Station 8 sang Sabado sang gab-i.
Suno kay Mogato, si Mosquida ang ginakuhaan sang supply ni Cabiles kag siya man ang nagtudlo diri sa kapulisan.
Sa pagkadakop ni Cabiles, naaresto man ang asisstant sini nga si Darwin Sibugan, 18-anyos, residente sang nasambit nga lugar.
Nakuha sa ila paghikop ang 18 ka heat sealed transparent plastic sachet sang suspected shabu, P220 nga proceeds money kag mga drug paraphernalia.
Ang nakumpiskar nga illegal nga druga ang ginabanta nagabug-at sang 32 gramos kag may estimated market value nga P217,000.
Sa karun nakahunong na ang mga ini kag natalana nga magapangatubang sang kaso nga paglapas sang kaso nga paglapas sa R.A. 9165 ukon Comprehensive Dangerous Drugs Act of 2002.
Samtang, antes ang pagkaaresto sang duha, una anay nga nadakpan si Reymar Mosquida, 48 anyos, buybust operation nga ginpatigayon sang Bacolod Police Station 8 sa Barangay Singcang Airport.
Suno kay Police Major Joery Puerto, station commander sang Bacolod Police Statio 8 nakuhaan ini sang 20 ka gramos sang suspected shabu nga may estimated market value nga P136,000.
Suno kay Puerto, si Mosquida ang ginakuhaan sang halos tanan nga pusher kag masami ini nga nagasaylo-saylo sang barangay.
Ila pa sa karun ginaverify kun sin-o ang source sini sang illegal nga druga.
Nagpromisa naman ini nga indi sila mag-untat sa pagpatigayon sang operasyon sang Barangay Singcang Airport tubtob nga maubos ang mga durugista.
