Masobra 8,000 ka mga mangunguma kag mananagat sa probinsya sang Negros Occidental nga tuman nga naapektuhan sang El Niño ang magabaton sang ayuda gikan sa Office of the President.
Suno kay Presidential Communications Office Assistant Secretary for Television Dale De Vera, magapadulong si President Ferdinand ‘Bongbong’ Marcos Jr. sa probinsya, bwas nga adlaw, Hunyo 27, para maghatag sang P10,000 nga cash assistance sa 8,315 ka mga mangunguma kag mananagat sa probinsya.
Sa kabug-usan, P83,150,000 ang balor sang assistance nga magagikan sa Office of the President sa idalum sang Presidential Assistance for Farmers, Fisherfolk, and Families (PAFFF).
Sa ceremonial event nga patigayunon sa football field sang University of Negros Occidental-Recoletos (UNO-R) sa Bacolod City, pila lamang ka mga beneficiaries ang magabaton sang ayuda, bangod nga ihatag na lamang sa gobernador kag mga alkalde sang tagsa ka mga local government units ang ayuda kag sila na ang managtag sa mga benepisyaryo.
Sila ang pagahatagan sang 30 ka adlaw para ma-liquidate ang assistance kag mapasa ang report sa Office of the President.
Samtang, may yara man sang patigayunon nga ‘LAB for All’ Caravan nga magahatag sang libre nga laboratory services, kag ini ang proyekto naman ni First Lady Liza Araneta-Marcos.
Samtang, preparado naman ang Bacolod City Police Office sa paghatag sang seguridad sa pag-abot sang presidente bwas, Hunyo 27.
Suno kay Police Major Elmer Bonilla, station commander sang Bacolod Police Station 1, may yara na sang napreparar nga itinerary para sa presidential arrival.
Samtang, ginalauman man ang pagbisita sang presidente sa banwa sang La Castellana agud makita sini ang mga pumuluyo nga naapektuhan sang paglupok sang Bulkan Kanlaon.
