Masobra P4.5 million ang balor sang suspected shabu nga narecover sa drug buybust operation sa Purok Riverside, Barangay Bata, Bacolod City alas-12:30 kaina sang kaagahon.
Ang operasyon ang ginpatigayon sang Bacolod City Police Office – City Drug Enforcement Unit (BCPO-CDEU).
Ang mga suspetsado ang ginkilala nga sanday Erwin Belonio alyas Boy, 34 anyos, single residente sa Zone 11, Barangay Handumanan; kag Anthony Solon, 38 anyos residente sa Purok Riverside, Barangay Bata lunsay mga high value individual (HVI).
Narecover sa duha ang anom ka knot-tied transparent plastic bag kag 11 ka transparent plastic sachet sang suspected shabu kalakip na ang buybust item.
Ang suspected shabu ang ginabanta nagabug-at sang 675 gramos kag nagabalor P4,590,000.
Nakuha man sa mga ini ang P3,000 nga buybust money, isa ka sling bag, isa ka coin purse kag P300 nga cash proceeds.
Sa interview sang Bombo Radyo kay CDEU head Police Lt. Joven Mogato, nakabaton sila sang report nga may nagabaligya sang shabu sa lugar sang buybust operation gani ini ang ginvalidate tubtub nga nakasa ang buybust kagab-i.
Suno kay Mogato, madugay na sila nakabaton sang report nga nagabaligya sang shabu si Erwin Belonio kag gintinguhaan man nila nga ini ang madakpan sa operasyon apang aware na ini sa hulag sang mga pulis bangud nakaagi naman ini priso.
Si Belonio ang napriso sang tuig 2012 bangud sa kaso nga homicide apang nakagwa sa prisuhan matapos magpyansa.
Sang tuig 2017, napriso man si Belonio matapos nadakpan sa drug buybust operation kag nakagwa sa prisuhan sang Enero subong nga tuig.
Si Anthony Solon naman ang napriso man bangud sa kaso nga robbery kag sang Lunes, Setyembre 19, lang siya nakagwa sa prisuhan.
Suno kay Mogato, nagtinir si Solon sa balay nanday Belonio kag wala pa nakapauli sa ila nga balay halin sang nakagwa ini sa prisuhan bangud mag-abyan sila sang nauna.
Nakibot naman ang mga otoridad nga magkaupod sanday Belonio kag Solon sa isa ka balay bangud si Belonio ang mayor nga target.
Santo sa monitoring sang CDEU, sa gwa sang Region 6 ginakuha sang duha ang drug supply kag ginapasulod ini sa Bacolod paagi sa isa ka courier.
Ang duha ang priso sa karon sa Bacolod Police Station 2 kag ginahanda na sang mga otoridad ang kaso nga paglapas sa Section 5 kag Section 11 sang Republic Act 9165 ukon Comprehensive Dangerous Drugs Act of 2002.
